أنا مش شاعر

كل ما أقول ل حد إقرا اللي أنا كاتبه ده، سواْ آه يا صديق أوسلام يا دنيا أوغيرهم...

بيكون الرد:حلو الكلام ده بس مش شعر.

!!!شعر

أنا قلت شعر؟

إيه إدمان التصنيف اللي عند الناس ده؟ ليه الحاجة منقدرش نستمتع بيها زي ما هي، نقيمها علي ما هي عليه، لازم تكون مُعنونه.أنا لا أكتب" شعراً"ومن ناحية أخرى أري شاعر في طباخ بيطبخ بمزاج وفي سواق أتوبيس بيسوق بقلبه وفي عجلاتي مبيقدرش يزعل حد....

أري شاعر في راقصة باليه تتقنه،كل اللي بيعمل حاجة بنفس يستحق لقب فنان.

وحاش لله أن أضع نفسي في مقارنة معه لكن بودلير لما كتب قصيدة نثر ما هو شاعر برضه وعم الشعرا في الشعر المعاصر.

أنا لما بدوس إنتر أو لما ببتدي سطر جديد مش بقول إن ده بيت أو شطر أو أياً كانت المسميات، كل اللي عايز أوصله إن اللي بيقره لازم ياخد وقت أطول قبل ما ينتقل للجملة التاليه، وقت أطول من فاصلة ومن نقطة ومن تلات نقط، سكته، وقفة للتأمل اللي أصبح شْ نادر مع زخم الكتابات والأنتاجات،مع خفة ذاكرة أي واحد فينا.