آه ه ه ه يا صديق

مش مستنى منك رد يا صديق، أنا بس صعبان عليا اللى كان،
صعبان على البيت اللى اتبنى عشان يسكن فيه فضاه،
صعبان عليا الدفا، صعبان على السهر والشعر.
مفيش كلام يتقال يا صديق
هقول إيه لدراعى لو سابنى ومشى؟
هقول إيه للفرح لو رفض يستنى؟
آه ه ه يا صديق

عَتَبى على الأيام اللى
غَيَرت جمعت، غَيَرت فَرَقٍت
عَتَبى على الأيام اللى
شَيبت قلب حنون غلبان
كَتَمت فيه الدموع
عَصَفت بيه الرياح
دابت فيه الجروح
آه ه ه يا أنا
لما كنت صديق

قالوا الحزين فى الضل
قلت انا مالكم؟
الحب ليكم جفا
صنعة ومدارس
البرد ليل ونهاروانا أملى حبة دفا
الود ودى أشوف الود لو لحظة
والود منى انتفى
آه ه ه يا صديق

حُضن كبير يٍساعنى يغسلنى
يبعدنى عن البلاستيك والمسلح والتراب
يبعدنى عن زيف مُتقن متلمع،
يطمْنى
إعذرنى يا عظيم لو قلت تانى بلسانك
أنا شاب لكن عمرى ولا ألف عام
وحيد كنت إنت وبين ضلوعك زحام
وحيد أنا زًَيَك،
...
البُعد بُعدين وتلاته
آه ه ه يا صديق