آه
لو عندى ألف جناح
لأطير وأرفرف فى السما
وأسابق العصافير وأتقلب و أتشقلب واركب حصان الهوا
وأغسل صدرى بهوا السما السابعة
وأقول مواويل
وأغنى لكل مخاليق ربنا
وأنقش قلوب الناس بالزقزقة
ده لكل غنوة جناح
هانشر عبير الخير على روسهُم نفر نفر
هابوس أيادى الشقيانين
هاهدى ريشة لكل عاشق
هاموت على دمعة حزين، هاصمت حداد على كل مخلوق إتظلم
هادوب فى كل برىء
آه لو عندى ألف جناح
يا فرحتى وأنا باصبح عالمراكبية
يافرحتى فى الفجر قايم ألِم أغصان لِعِشِى ووِلفِتِى
راضى وراضى ربنا شقيان وجايب لقمتى
يا فرحتى بناس بتحب ناس
قلوب تعرف قلوب
والخضرة عيشتى وجنتى
وأُمِّتى ، والورد والياسمين حبايبى وصحبتى
والقمح قوتى وبهجتى
يا فرحتى والشمس طاله مغطية حنين و بين
على حسرة فراق
نهار ودود
عيون ودود
نهار وفات مالهوش أثر
آه لو عندى ألف جناح
أوزع الجناحات بين البشر
أطلق قلوب فى الفضا
تبحث تشوف
تنده وتفهم رد الندا
تشوف بعيون إله لون الحياة
ألوان جريئه ومبهجة
لا للزعل لا للرتابة والملل
No comments:
Post a Comment